Ætlar hann að setjast á Ingibjörgu?

Er að velta fyrir mér myndinni með þessari frétt. Er Steingrímur að fara að setjast á Ingibjörgu Sólrúnu? Hvert er maðurinn að fara? ... :)

Hittast kl. 14 í dag

Video af ISG við komuna til Keflavíkur

Á meðfylgjandi slóð má sjá í myndbandi yfirlýsingu Ingibjargar Sólrúnar Gísladóttur við komuna til Keflavíkur í dag.

 http://vf.is/Frettir/39326/default.aspx

 

Ingibjörg Sólrún komin heim

Búnaður til pípulagna...

Finnst myndatextinn "Búnaður til hassreykinga" alveg frábær. Finnst þetta frekar vera til pípulagna og þess háttar. Er þetta gírstangar-hnúður hægra megin á myndinni? Þessi búnaður er a.m.k. ekki svona "2007"...

Teknir með hass

Lík í dráttarbrautinni

Nú æsast leikar. Grétar verktaki hjá Grettistaki hafði greinilega óhreint mjöl í pokahorninu og hann sá þá lausn eina að hengja sig í Skipasmíðastöð Njarðvíkur. Að sjálfsögðu fann blaðakonan á Póstinum líkið hangandi í húsinu við dráttarbrautina, eftir að hafa komið fýluferð suður með sjó til að taka viðtal við Grétar. Fýluferðin leiddi af sér ferð í Go-Kart í Reykjanesbæ og þaðan sá blaðakonan í gegnum ofur-ljósmyndavélina sína að bíll með einkanúmerinu GRÉTAR stóð fyrir utan slippinn.

Ég er að sjálfsögðu að skrifa um annan þáttinn af PRESSU, spennuþáttaröðinni á Stöð 2. Frábærir þættir. Alveg hreint ágætis afþreying. Ræddum svolítið um myndavélina hjá blaðakonunni, strákarnir á ritstjórninni hjá Víkurfréttum. Vorum allir sammála um að fá okkur svona vél, eða a.m.k. svona linsu. Enginn smá aðdráttur!

Að sjálfsögðu er sögusviðið í PRESSU komið hingað Suður með sjó, því á Suðurnesjum gerast hlutirnir. Miðað við höfðatölu eru víst flest ofbeldisverk og morð framin í Keflavík, sá ég í fréttunum um daginn. Bíð spenntur eftir næsta þætti af PRESSU!

Loftmyndina tók vinur minn Oddgeir Karlsson.

Þú mátt leita - en bara ekki svona oft...

Þar sem ég er á kafi í stjórnarstörfum fyrir björgunarsveitina mína í Garðinum þá fékk ég úthlutað því verkefni á félagsfundi í gærkvöldi, mánudagskvöld, að sækja um lén fyrir björgunarsveitina okkar, þannig að við gætum sett um vefsíðu og tölvupósta. Þar sem ágætt sundfélag heitir Ægir og hefur lénið aegir.is og ægir.is, þá vandast málið. Eftir að hafa slegið upp á netinu nokkrum lénum sem koma til greina, þá fór ég inn á síðuna hjá ISNIC, Internet á Íslandi, til að kanna hvort eitthvað af þeim lénum væru á lausu sem mér fannst koma til greina fyrir sveitina okkar.

Er með niðurskrifaðan lista yfir hin ýmsu lén sem ég hafði látið mér detta í hug. Eitthvað af þeim eru greinilega frátekin þó svo engar síður séu á bakvið þau. Hins vegar ákvað ISNIC að skella í lás á mig, ef svo má segja. Aðgangur minn að "Whois:" leitarhlutanum var sem sagt takmarkaður tímabundið. Upp kemur gluggi sem segir:

Aðgangur tímabundið takmarkaður

Aðgangi þínum að uppflettingu í rétthafaskrá ISNIC hefur verið lokað, tímabundið.

Því miður hefur reynst nauðsynlegt að loka tímabundið á aðgang frá tölvu þinni (xxx.xxx.xxx.xxx) vegna óeðlilegs fjölda uppflettinga eða annara óleyfilegra aðgerða frá þessari IP tölu. Reyndu aftur síðar.

Ég veit ekki alveg hvernig ég á að skilja þetta. Ég mátti greinilega fletta upp á vefnum hjá þeim, en bara ekki svona oft! „...vegna óeðlilegs fjölda uppflettinga eða annara óleyfilegra aðgerða". Ég hef örugglega verið að kafsigla ISNIC með því að slá inn nokkur mismunandi „óskalén" og kanna hvort einhver væri skráður eigandi þeirra. Fékk skyndilega þá tilfinningu að ég væri að brjótast inn í tölvukerfið þeirra, við þá einföldu aðgerð að kanna hvort nokkur lén væru á lausu. Veit ekki hvenær tímabundinni lokun á mig verður aflétt. Ég á ennþá eftir að prófa nokkur lén. Kannski að ég sendi þau bara til þeirra í tölvupósti og spyrjist fyrir um þetta í pósti, í stað þess að setja tölvukerfið hjá ISNIC á hvolf svona á nótttunni...

- Vona svo sannarlega að google.com taki ekki svona á móti mér þegar ég þarf að leita á síðunni þeirra næst!

Forsetinn að brjóta lög?

Hnaut um þetta á bloggi Björns Bjarnasonar, dómsmálaráðherra: „Íslenski fáninn sómir sér vel í sal alþingis við hægri öxl þess, sem situr á forsetastóli þingsins og ræðumanns í salnum. Þarna er farið að reglum um stað fánans. Skjaldarmerkið er við hægri öxl forsætisráðherra, þegar hann flytur áramótaávarp sitt. Þegar forseti Íslands flytur þjóðinni nýársávarp sitt úr sal Bessastaða, er íslenski fáninn hins vegar við vinstri öxl forsetans. Þetta er stílbrot.

Í fánareglum segir: „Sé fáni á stöng við altari, ræðustól eða ræðuborð, leiksvið eða annan sambærilegan stað, skal hann vera vinstra megin séð frá áhorfanda."

Myndin er fengin af vef Ríkisútvarpsins.

Flott skaup og fínn annáll

Ég verð að hrósa Sjónvarpinu fyrir áramótaskaupið 2007. Flott vinnsla á því og fínn húmor. Þegar horft er á skaupið er eiginlega nauðsynlegt að vera búinn að horfa á fréttaannála sjónvarpsstöðvanna af innlendum vettvangi.

Horfði á annála bæði Stöðvar 2 og Sjónvarpsins á gamlárskvöld. Þeir voru mjög ólíkir. Stöð 2 lagði spilin á borðið með því að birta topp 10 lista í innlendum og erlendum fréttum. Sjónvarpið var á hefðbundnum nótum og tók árið fyrir mánuð fyrir mánuð. Persónulega fannst mér Sjónvarps-annállinn betri. Ég var upplýstari um fréttir síðasta árs eftir að hafa horft á annál RÚV. Gamlárskvöld er eina kvöld ársins sem ég horfi meira á Sjónvarpið en Stöð 2.

Þarf svo sem ekki að segja frá því að að sjálfsögðu átti ég myndskeið í báðum annálum sjónvarpsstöðvanna. Í annál Stöðvar 2 átti ég mest sýndu sjónvarpsmyndir síðasta árs á Stöð 2, sem eru gufubólstrar við Svartsengi og voru gerðir ódauðlegir í fréttum um Geysi Green, Hitaveituna og síðar REI... Í annál Sjónvarpsins átti ég myndir af slysinu á Vesturgötu í Keflavík, þar sem ungur drengur lést, en ökumaður stakk af frá slysinu.

Ég er fréttafíkill, eins og einhversstaðar hefur komið fram. Ég horfi yfirleitt á fréttir Stöðvar 2 og Ísland í dag í sjónvarpstækinu  en rúlla svo yfir fréttir Sjónvarpsins í vefsjónvarpinu á netinu og sama á við um seinni fréttir sjónvarps. Hádegisfréttir Stöðvar 2 sé ég yfirleitt á netinu og ég hef horft á alla fréttatíma MBL sjónvarps á netinu. Ekki misst út einn fréttatíma... Svona er maður nú skrýtinn þegar kemur að fréttum.

Góð PRESSA

Vil hrósa Stöð 2 fyrir nýju spennuþáttaröðina PRESSU, sem sýnd er á sunnudagskvöldum. Fyrsti þátturinn lofar góðu fyrir framhaldið. Þrátt fyrir 20 ár í bransanum þá hef ég aldrei unnið á dagblaði. Ferilskráin mín er eiginlega bara Víkurfréttir. Veit svo sem ekki hvort fyrsti þátturinn er að gefa rétta mynd af lífinu á blöðunum, en þetta er ágætis afþreying og verður örugglega spenna þegar á líður. Gaman að segja frá því að ég til mig hafa átt lítið myndbrot í fyrsta þætti Pressu. Því brá fyrir í sjónvarpsfréttum í þættinum þar sem kría settist á stein úti á Reykjanesi! (http://www.vf.is/vefTV/48/default.aspx) Svona hefur maður haukfrá augu sem sjá „börnin sín" hvar sem þeim bregður fyrir, en myndirnar voru teknar í júlí 2006.

Bíð sem sagt spenntur eftir næsta þætti PRESSU á Stöð 2.

Innanlandsflugið til Keflavíkur mælist mjög vel fyrir!

Tilvitnun: „Flugfélag Íslands tók upp þá nýbreytni í samstarfi við Icelandair að bjóða upp á beint flug til og frá Keflavík þrjá daga í viku í tengslum við áætlunarflug Icelandair til Evrópu og Ameríku og mæltist það mjög vel fyrir.“

Hef það fyrir satt að það muni einnig mælast mjög vel fyrir að flytja allt innanlandsflug til Keflavíkur og fá á sama tíma fullkomna tengingu við millilandaflug. Mikilvæga þjónustu sem landsbyggðin þarf að sækja til Reykjavíkur með innanlandsflugi má einnig flytja til Keflavíkur/Reykjanesbæjar/Suðurnesja. Minni ykkur bara á umferðarhnúta og bílastæðaskort í miðborg Reykjavíkur. Slíkt þekkist ekki hér Suður með sjó!

Bestu óskir um gleðilegt nýtt ár!

Myndin: Frá Keflavíkurflugvelli í gærdag. Ljósmynd: Hilmar Bragi Bárðarson

200 þúsund farþegar

Róa sjómenn í flugstöðinni og landa í Fríhöfninni?

Ég á svolítið erfitt með að skilja upphæðirnar sem sveitarfélögin á Suðurnesjum fengu frá félagsmálaráðherra og greint er frá í fréttinni hér að neðan og má finna á www.vf.is. Tek sem dæmi Sandgerðisbæ. Hann fær rétt um eina milljón króna vegna tekjumissis vegna tímabundins samdráttar í aflamarki þorsks. Þetta eru um það bil hásetalaun tveggja í mánuð. Hvað ætlar svo Sandgerðisbær að gera við öll herlegheitin. Deila þeim niður á fjölskyldur sjómanna í Sandgerði sem ekki mega veiða þorsk? Hef grun um að upphæðin verði tíkarleg! Hitti bæjarstjórann í Sandgerði í gær og óskaði honum til hamingju með milljónina. Hann hafði ekki fengið fréttirnar og varð undrandi. Skil hann vel. Hann segir að svörin sem hann fái séu þau að Sandgerðingar hafi flugstöðina. Ekki róa sjómenn þar, nema þeir eigi að landa í Fríhöfninni. Hvað á annars að gera við milljónina frá "frúnni í féló?" er spurt í Sandgerði í dag.

Fréttin af www.vf.is:

Félagsmálaráðherra hefur ákveðið úthlutun á 250 milljónum króna til að koma til móts við þau sveitarfélög sem verða fyrir tekjumissi vegna tímabundins samdráttar í aflamarki þorsks. Grindavíkurbær fær mest sveitarfélaga á Suðurnesjum í þetta skipti, rúmlega 35 milljónir króna. Samtals koma um 45 milljónir króna til Suðurnesja að þessu sinni. Um er að ræða fyrsta hluta af þremur en ríkisstjórnin hafði ákveðið að veita samtals 750 milljónir til þessa verkefnis á þremur árum og er það hluti af mótvægisaðgerðum vegna niðurskurðar í aflaheimildum á þorski.

Listinn yfir úthlutunina til sveitarfélaga á Suðurnesjum er eftirfarandi:

Reykjanesbær 919.205 krónur
Grindavíkurbær 35.111.250
Sandgerðisbær 1.033.269
Sveitarfélagið Garður 6.512.962
Sveitarfélagið Vogar 1.116.599

Myndina tók vinur minn Reynir Sveinsson og er hana að finna í myndarlegu myndasafni á vef Sandgerðisbæjar.